A Rinconada kadakul sagkud mayaman sa manga makokolor na ginigibo na mababayad pa ngowan na panawon.
Pang-arana
Usad ading paagi sa pamimiraw sa babayi. Kin a lalaki gostong ipabayad a gusto niya na mamiraw sa babayi, a lalaki nag-aanap sa kaiba tapos agko daradarang gitara o kaya karaoke machine na ibinubutang sa atobangan ka baluy ka babayi na diri sinabi kin lawud na. A babayi o kaya a pamilya ka babayi agko pigpilian kin paluludabun a solo tanganing atobangun a nang-aarana o diri. Minsan pag abu ka pamilya a nang-aarana binoboboan nira adi sa tobig o kaya binibiliwan a kandang ayam tanganing suludun a nang-aarana.
Pa-aurora
A kostombreng adi agko relasyon sa relihiyon kaya ginigibo nira adi para sa kandang “panata” nagpapabayad ka kandang kamuy’an sa Diyos holi ka dakul na inani o agko sira inayat na gosto nirang masimbag. Ginigibo adi sa paagi ka “Aurora”. Sa siyam na sonodsonod na alduw migdekorasyon sira sa ginibong “carroza” para sa local nirang santo pangala migbisita sa manlainlain na baluy sa kapalibotan nira na nagkakanta sagkud nangangadyi.
Pista sa mga Kalag
Siniselebrar adi kada Nobyembre 1, alos ngamin na tawo nag-iiyan sa kampo santo. Usad ading selebrasyon na nagtatao sa onra sagkud pagrumrum sa manga nagraan ng kapamilya. Migdara sira sa borak sagkud migsolo sa kandila sa kandang mang pantiyong, o kaya dedekorasyonan ka pamilya a moseleyo sa manga borak sagkud pagkaun. A local na kampo santo nagigin boway kada Nobyembre 1 tanganing rumrumun a Alduw sa manga Santo anggan sa Nobyembre 2 na ramrag para sa Alduw sa manga Kalag.
Tanggal kin Cuaresma
Ginigibo adi kin Alduw sa manga Santo, agko nagkapirang prominenteng pamilya sa Rinconada a migsponsor sa “Tanggal”. A "Tanggal" usad na pag-arug ko manga kasakitan na ginibo ni JesuCristo sagkud pagkagraan sa kros. Pagkatapos na arugun so pagsakit ni JesuCristo, a “Tanggal" tinatapos kaiba a "Ire Helena” so istorya ni Helene sagkud Constantine sa pag-anap ko matood na kros.
Pag-lili
Kin a usad na miyembro ka pamilya o siisay man na nabubutan nagraan na, a pamilya, barkada sagkud manga kapamilya ko nagraan migtao sa pangadyi sa luug sa siyam na alduw. Amo adi a siyam na alduw na pagmundu na kin sari nag-iiyan sira sa local na simbaan o nag-aatindir sa mesa sagkud pagkatapos nagpapadagos ka kandang pangangadyi sa baluy ka nagraan. A pangadyi iinaatang tanganing tabangan so kalag ko nagraan na magkaagko katoninungan sagkud amo man na maranga a nagmumundung pamilya.
Katapusan
Pagkatapos sa kwarentang alduw na pagmundu, a pamilya, amigo sagkud iba pang kapamilya migselebrar sa paagi sa andaan sagkud imbitaran so ngamin na nakidomamay kanda ko sira nagmumundu. Mantang a ngamin imbitado nagsasabi sira sa manga pangadyi sa kandang santa. Nagtotobod sira na so kalag ko nagraan nakalampas na sa maribok na boway sagkud nagkaagko na katoninungan anggan pa man. Amo adi a panawon na nakaliwas na sira , pwede na sirang magsopong sa ibang kolor na bado imbes na priming itum sagkud poti arug sa nakaosowan.
Dotoc
Bago magpiyesta sa barangay, a “Dotoc" ginigibo sa pagsamba ka patron na santo nira sa luug sa siyam na gab’i para sa pagpapasalamat.
